Paragnóstiko Martien Verstraaten na Kòrsou
Editorial, La Prensa – LOKAL
13 desèmber 2003, Kòrsou / Antia Hulandes
WILLEMSTAD – Aktualmente ta na Kòrsou e Paragnóstiko Martien Verstraaten for di Ulanda.
Ta trata aki di un persona ku abilidatnan paranormal ku ta usa esaki pa lòs abilidatnan serka hendenan pa premirá futuro, haña poder riba talentonan di den bida anterior i bin den kontakto ku sernan den otro dimenshon. E ta yuda hende pues pa haña kontesta riba pregunta den seshonnan paranormal i tambe di regreshion. Komo líder spiritual Martien Verstaaten ta usa su donnan paragnóstiko pa lòs destinashonnan den supkonsiensia pa esnan ku no por komprondé sierto misterio.
Di e forma aki e ta traduktor di nan transformashon. Verstraaten a biba pa basta aña na Brazil, kaminda ela tene vários tayer i seshon ku personanan interesá pa siña nan kon usa adaptashon di e forsanan ku nan tin i ku nan no sa kon usa òf nan ta konsiente di dje. Verstraaten mes a deskubrí for di chiki su abilidatnan di telepatia, intuishon i karisma i a disidí na usa su konosementu pa otro hendenan por deskubrí di nan mes tambe. Martien Verstraaten a splika ku “E konosumentu aki tei den tur hende. Mi ta wak hende i ta manera ku nan ta bisami: lantami for di soño, por fabor. I ta esei mi ta hasi”. E ta sigui bisa ku universo ta masha inteligente mes.
E téknika di Martien Verstraaten, ta basá riba un kombinashon di diferente tereno. Ku fasilidat ela move durante di su karera den arte, edukashon i parasikologia. E tabata docente invitá na diferente instituto kaminda ela duna instrukshon den materianan manera Cibernetica den proseso di murimentu, arte sigíko i komportashon energétiko den arte di tekstil. Personanan interesá den un seshon paranormal òf di regreshon por tuma kontakto ku Martien Verstraaten.
